ကိုဗစ် ၁၉ ကပ်ရောဂါကာလအတွင်း စီးပွားရေးကျပ်တည်းမှုအခြေအနေကြောင့် စင်ကာပူနိုင်ငံသားတို့၏ အလုပ်အကိုင်တည်မြဲရေးနှင့် စီးပွားရေးလုပ်ငန်းများ၏ ရပ်တည်နိုင်ရေးတို့ အတွက် အစိုးရအနေဖြင့် အကောင်းဆုံးပံ့ပိုးပေးသွားမည်ဖြစ်ကြောင်း ၂၇ - ၇ - ၂၀၂၀ ရက်နေ့တွင် ပြုလုပ်ခဲ့သည့် စင်ကာပူနိုင်ငံ အစိုးရအဖွဲ့ အသစ်၏ ကျမ်းသစ္စာကျိန်ဆိုပွဲတွင် ဝန်ကြီးချုပ် Mr Lee Hsien Loong က ပြောကြားခဲ့ပါသည်။
ဝန်ကြီးချုပ်၏ မိန့်ခွန်းတွင် ကမ္ဘာအနှံ့ကိုဗစ်ရောဂါအခြေအနေမှာ ဆိုးရွားခဲ့ကြောင်း၊ ဟောင်ကောင်နှင့် ဆိုးလ်မြို့ကဲ့သို့သော အစပိုင်းတွင် ရောဂါထိန်းချုပ်နိုင်ခဲ့သော အနေအထားမှ ကန့်သတ်ချက်များနှင့် စီးပွားရေးဆောင်ရွက်ချက်များကို ပြန်လည်ခွင့်ပြုခဲ့သောကာလနောက်ပိုင်း၌ ရောဂါကူးစက်မှု ထပ်မံဖြစ်ပွားလာသော အခြေအနေများသည် စင်ကာပူအနေဖြင့်လည်း ရောဂါထိန်းချုပ်နိုင်ရန်အတွက် မည်မျှအထိခက်ခဲမည်ကို ဖော်ပြနေကြောင်း၊ စင်ကာပူတွင် စီးပွားရေးဆောင်ရွက်ချက် များနှင့် နယ်စပ်ဝင်ထွက်မှုများကို တဖြည်းဖြည်းပြန်လည်ခွင့်ပြုနေသည့်အတွက် ရောဂါကူးစက်မှုအား ကာကွယ်နိုင်ရန် ရောဂါစစ်ဆေးခြင်း၊ ရောဂါဖြစ်ပွားသူနှင့် အနီးကပ်ထိတွေ့သူများအား နောက်ကြောင်းလိုက်ခြင်းတို့ကို ပိုမိုဆောင်ရွက်နိုင်ရန် ကြိုးပမ်းလျက် ရှိကြောင်း ပြောကြားခဲ့ပါသည်။
အစိုးရအနေဖြင့် စီးပွားရေးလုပ်ငန်းများ ဆက်လက်ရပ်တည်နိုင်ရန်နှင့် လုပ်သားများ အလုပ်အကိုင်ဆုံးရှုံးမှု အနည်းဆုံးဖြစ်ပေါ်စေရန်အတွက် စင်ကာပူဒေါ်လာ ၁၀၀ ဘီလီယံနီးပါး သုံးစွဲသွားမည်ဖြစ်ကြောင်း၊ စင်ကာပူ၏ စီးပွားရေးတိုးတက်မှုသည် ၂၀၂၀ ခုနှစ်၊ ဒုတိယ (၃)လပတ်တွင် ၁၂.၆ ရာခိုင်နှုန်းအထိ ကျဆင်းခဲ့ပြီး၊ စီးပွားရေး အခြေအနေ ပိုမိုဆိုးရွားလာပါက အလုပ်အကိုင်ဆုံးရှုံးမှု ပိုမိုပေါ်ပေါက်လာမည်ကို မျှော်မှန်းထားရမည်ဖြစ်ကြောင်း၊ ထိုသို့ အလုပ် အကိုင်ဆုံးရှုံးသွားသူများအတွက် အလုပ်အကိုင်အသစ်များရှာဖွေပေးနိုင်ရန် အတတ်နိုင်ဆုံး ဆောင်ရွက်သွားမည်ဖြစ်ပြီး၊ ကိုဗစ်ကြောင့် ရပ်ဆိုင်းထားရသောလုပ်ငန်းများ ပြန်လည်စတင်နိုင်ရန် အတွက် လည်း ကူညီပေးမည်ဖြစ်ကြောင်း၊ နိုင်ငံခြားလုပ်သားများ နေထိုင်သောအဆောင်များတွင် ရောဂါကူးစက်မှုကြောင့် ဆိုးရွားစွာ ထိခိုက်မှုဖြစ်ပေါ်ခဲ့သော ဆောက်လုပ်ရေး လုပ်ငန်းများအတွက် နိုင်ငံခြားလုပ်သားများအပေါ်ကောက်ခံသည့်အခွန်နှင့် အခကြေးငွေများ သက်သာစေရေး ပံ့ပိုးပေး လျက်ရှိကြောင်းနှင့် နိုင်ငံတကာစျေးကွက် အပေါ်များစွာမှီခိုရသော ထိခိုက်မှုပြင်းထန်ခဲ့သည့် ခရီးသွားလုပ်ငန်းနှင့် လေကြောင်းပို့ဆောင်ရေးကဏ္ဍများရှိ လုပ်ငန်းများကိုလည်း ကူညီပံ့ပိုးပေးနိုင်ရန် စင်ကာပူ ဒေါ်လာ ၂ ဘီလီယံနီးပါး လျာထားပါကြောင်း ပြောကြားပါသည်။
ဝန်ကြီးချုပ်သည် လာမည့်ကာလများတွင် အစိုးရနှင့် လုပ်ငန်းများသည် ခက်ခဲသော ရွေးချယ်ဆုံးဖြတ်မှုများကို ပြုလုပ်သွားရမည်ဖြစ်ကြောင်းနှင့် လုပ်ငန်းကဏ္ဍအချို့မှာ ရောဂါဖြစ်ပွားမှုမတိုင်မီကာလက အခြေအနေကို ပြန်လည်ရရှိနိုင်မည်မဟုတ်ကြောင်းကိုလည်း သတိပေးခဲ့ပါသည်။ အလားအလာမရှိသော လုပ်ငန်းများနှင့် ထိုလုပ်ငန်း များ၏ လုပ်သားများကို အလုပ်အကိုင်ဆုံးရှုံးမှုမဖြစ်ပေါ်စေရန် ကာကွယ်ပေးနိုင်မည်မဟုတ်သောကြောင့် ရေရှည်အတွက် ပိုမိုကောင်းမွန်သောနည်းလမ်းမှာ လုပ်ငန်း ကဏ္ဍအသစ်များ၊ အလုပ်အကိုင်အသစ်များ၊ စွမ်းရည်အသစ်များပေါ်ထွက်လာစေရန် မိမိတို့၏ သွင်းအားစုများကို ရင်းနှီးမြှုပ်နှံသွားကြရမည် ဖြစ်ကြောင်း၊ စင်ကာပူ အနေဖြင့် စီးပွားရေးအသွင်ကူးပြောင်းဆောင်ရွက်ခြင်းနှင့် လုပ်သားများ၏ ကျွမ်းကျင်မှုမြှင့်တင်ခြင်းတို့ကို ဦးစားပေးဆောင်ရွက်သွားပါက အကျပ်အတည်းကာလ လွန်မြောက်ချိန်တွင် အဆင်သင့်အနေအထား ရှိမည်ဖြစ်ကြောင်းနှင့် မိမိတို့၏ ရည်မှန်းချက်မှာ လက်ရှိအကျပ်အတည်းမှ ရှင်သန်လွတ်မြောက်ရန်အတွက်သာမဟုတ်ဘဲ နိုင်ငံ၏ ကာလရှည် ဦးတည်ချက်ကို ချမှတ်ဆောင်ရွက်သွားနိုင်ရန်ဖြစ်ပါကြောင်း ထည့်သွင်းပြောကြားခဲ့ပါသည်။
(မြန်မာစီးပွားရေးသံမှူး၊ စင်ကာပူနိုင်ငံ)
သတင်းရင်းမြစ် ။ ။ The Straits Times
